عزيزى القارئ (ازيك ... عامل اية فى الدنيا)
أول كلامى الفاضى بس اللى معقول ... تصدق إن فى بيتك مخاطر أكثر من اللى فى أى مصنع كيماويات ... طبعاً حتقول يا لهوى.. تعالى معايا ندخل بيت أى حد (يكون كريم ) وأقولك ... تيجى نبدأ بالمطبخ بصفتة الهم الإقتصادى والهم الشاغل لكل أسرة غلبانة زينا وأكيد مظهر من مظاهر الست الشطورة إنها تعرف تطبخ كويس ... ما طولش عليكم تعالوا نشوف مخاطر المطبخ .
عندك سمن وزيت ولو الحالة كويسة يبقى فية زبدة (السايحة بتاعة عبد الفتاح القصرى) كلها مواد قابلة للإشتعال يعنى لو إتعرضت لجسم ساخن أو حرارة عالية بقى عندك حريق فى مطبخك (والعياذ باللة) ، وساعات بتكون بتحمر حاجة وفجأة تلاقى النار حولين القلاية ولو جنبها حتة فوطة ولا ورقة بقى حريق ويا ساتر استر.
دة لو حصل اوعى تحطى مية على القلاية اللى فيها الفرخة المحمرة / اللحمة .. النار حتنتشر لأن درجة غليان الماء (100 درجة مئوية) والزيت/السمن الساخن أكثر من كدة (حوالى 200 درجة مئوية) يعنى سعادتك المية حتغلى على طول ويحصل حاجة اسمها فوران للزيت الساخن (boil over/spill over) وتلاقى الزيت الساخن ينتشر ويتوغل وبقى حريق . وكمان المية لو استخدمت فى الإطفاء ...يبقى راحت عليك الفرخة المحمرة/حتة اللحمة ودة طبعاً مشكلة لوحدها.
طب تعملى اية..... تعملى إية ... غطي القلاية المولعة بغطاء حلة (من غير ما تصوتى) حتمنع الاوكسجين عن اللهب وتطفى الحريق على طول.
خلصنا من مخاطر النار ربنا يحفظكم .. ولا يحرق لكم أكل يارب ، تعالوا بقى نشوف الستات الشطورة دايما عندهم مواد منظفة لزوم غسيل المواعين (يعنى كلور ومواد مزيلة للدهون معظمها بها مركبات صودا كاوية وبوتاسا كاوية) دة كلها مواد سامة وآكلة يعنى لو طفلك جنبك فى المطبخ ومش واخدة بالك منة وخادلة شفطة .. بقت مشكلة وتسمم أوعى تخلية يرجع (يعنى يجيب اللى فى بطنة-vomiting) خدية على طول على أقرب مستشفى ولازم تخدى معاكى العبوة اللى شرب منها علشان تسهل على الدكتور العلاج ... ودايماً تكون المنظفات بعيدة عن الأطفال ...
وكمان سعات الستات الشاطرة تعجبها علبة/عبوة كان فيها منظف وبعد ما يخلص ... تستخسر ترميها وتغسلها وتحط فيها مية وتحطها فى الثلاجة .. طبعا دة خطر لأن أكيد حيكون فيها نسبة ولو بسيطة من التركيبة الكيمائية ومع سقعة المية يجى الباشا والأولاد يشربوا عادى ويدخل جسمهم سموم بسيطة لكن مؤثرة ..بلاش كدة لو زهقانة من جوزك إية ذنب الولاد... الرحمة حلوة
وكمان وقت الغذاء والستوتة بتطبخ والعيال جعانة.. رايحين جايين على المطبخ ، طبعا الطبخ نفسة ولو البوتاجاز شعلتة مش سالكة واللهب مش لونة أزرق وكمان التحمير وغليان الزيت/السمن ... يطلع أبخرة وغازات ضارة منها العدو اللدود (أول أكسيد الكربون) اللى نفسة يبقى ثانى أكسيد الكربون فيدخل الجسم من التنفس وجرى على كرات الدم الحمراء يأخذ الاوكسجين علشان يتحول بأمة على حسابنا وبالتالى تكرار التعرض للغاز دة تلاقى نقص فى هيموجلوبين الدم ومظاهر التعب والإعياء وكمان البشرة بتصفر .. يعنى زيادة استهلاك مواد التجميل ( الروج والروجاجو وكدة) للستوتة.
علشان كدة اهم حاجة يبقى فية تهوية فى المطبخ يعنى تركيب مروحة شفط ضرورى تسحب الغازات ونواتج الأكل المسبك والمحمرات وترميها فى داهية بعيد عن المطبخ .. وياعينى على الجيران يشموا ريحة دقة الملوخية والمحمر والمشمر ... ربنا معاهم.
وبمناسبة مروحة الشفط لما تكونوا خارجين تفسحوا الولاد أو زهقانين من الدنيا أو حتناموا شوية بعد الأكل والطحن .. أمانة عليكى ياستوتة تقفلى مروحة الشفط علشان ساعات الموتور بيولع من الحمل الكهربى (overload) أو يكون اللى ركبها عنده نقص فى الضمير .....
ربنا يحفظكم ويحفظ أولادكم من أى شر ..... معلش مضطر أسيبكم دلوقى .. أصلى جوعت من كتر الكلام عن المطبخ ....
إلى اللقاء فى بقية البيت .. المرة الجاية مخاطر غرفة النوم (ما حدش يفهم غلط) ..
سسسسسسسسسسسسسسسسسسسلام
هناك 4 تعليقات:
لا مش حنفهم غلط ههههه بس مخاطر غرفة النوم تنحصر في اللي نايم جنبك عالسرير هههههههه
واضح المدونة جديدة مبارك عليك ( مش مبارك اياه ) ههههه اهنيك على اختيارك للموضوع واسلوبك الظريف برغم الحرايق والسموم انما ضحكت من قلبي والله
جزاك الله خير على الموضوع المفيد الظريف
hi mishmish congratulations ihope for you all the best
from storm-cy
توفى الى رحمة الله الأخ صاحب المدونة
---
اللهم اغفر له وارحمه ، وعافه واعف عنه ، وأكرم نزله ، ووسع مدخله ، واغسله بالماء والثلج والبرد
ونقه من الخطايا كما ينقى الثوب الأبيض من الدنس ، اللهم أبدله داراً خيراً من داره وأهلاً خيراً من أهله ، اللهم أدخله الجنة وأعذه من عذاب القبر ومن عذاب النار وافسح له في قبره ونور له فيه ، اللهم لا تحرمنا أجره ، ولا تضلنا بعده وارحمنا واغفرلنا إذا صرنا الى ماصار اليه
اللهم آميييييييين
إرسال تعليق